خانه / د مرکز په اړه

د مرکز په اړه

 


قاصد د ستراتېژیکو څېړنو مرکز

کابل – افغانستان

قاصد د ستراتېژیکو څېړنو مرکز خپلواک، غیر انتفاعي او غیر حکومتي څېړنیز بنسټ دی، چې د یو شمېر نخبه افغان څېړونکو له لوري جوړ شوی دی. قاصد د افغانستان، سیمې او نړۍ د مهمو پېښو او سیاستونو د تخصصي، دقیقو او بې‌طرفانه څېړلو او له دې لارې د پالیسیو د سمون په موخه فعالیت کوي.

 

لرلید

  • د څېړنو له لارې په بېلابېلو برخو کې د واقعیتونو هغسې انعکاس، چې د جوړتیا لپاره یې سیاستونه او د عمل ډګر سره یو او بشپړ اغېزناک شي.
  • له افغانستان سره د سیمې او نړۍ د متقابلو اغېزو روښانه کول، چې له لارې یې په افغانستان او سیمه کې له ثبات سره مرسته وکړي.

 

وسائل او فعالیتونه

  • ګردي مېزونه: قاصد د هېواد او سیمې په کچه د مهمو قضایاوو د هراړخیزې او اغېزناکې څېړنې لپاره د متخصصینو او مسؤولینو څېړنیز بحثونه جوړوي او موندنې یې د پالیسي جوړوونکو لورو د ګټې اخیستنې لپاره د خپلو څېړنیزو نشراتو، رسنیو او نورو بېلابېلو لارو خپروي.
  • د پالیسیو بیاکتنه: قاصد په بېلابېلو برخو کې د پالیسیو د څېړنې له لارې، په مهمو سکتورونو کې شته ستونزې، نيمګړتياوې، فرصتونه او خنډونه څېړي او د ښه‌والي په موخه یې کره او دقيق وړانديزونه او حل‌لارې وړاندې کوي.
  • تحقیقي راپورونه: قاصد همدا راز د هغو مهمو پېښو او برخلیک ټاکونکو قضایاوو په اړه مهالني څېړنیز راپورونه خپروي، ترڅو په بېلابېلو برخو کې د پالیسیو له سمون او بدلون سره مرسته وکړي.
  • امنیتي راپور: ‌‌قاصد په افغانستان کې د روانې جګړې د ناوړه او درنو اغېزو د انعکاس لپاره د مهمو امنیتي پېښو ځانګړي تفصیلي او دقیق راپورونه او همدا راز په هېواد کې د جګړې د مرګ‌ژوبلې اوونیز، میاشتني او کلني راپورونه خپروي.
  • سروې: قاصد د حکومتي پالیسیو په تړاو د خلکو د نظرونو معلومولو لپاره د مهمو او برخلیک ټاکونکو قضایاوو په اړه نظرپوښتنې او سروې‌ګانې کوي، چې هم په څېړنو کې ترې کار اخلي او هم یې پایلې او موندنې له څېړنو پرته خپروي.

 

د څېړنو د تمرکز ډګرونه

په اوسني وخت کې په هېواد کې روانه جګړه او کمزورې حکومتولي د هېواد هغه بنسټیزې ستونزې دي، چې نورې ټولې برخې یې اغېزمنې کړې دي. قاصد د خپل رسالت په درک کولو سره، په اوسنۍ مرحله کې پر دغو دوو برخو د خپلو څېړنیزو فعالیتونو له لارې تمرکز لري.

 

د څېړنو پالیسي

قاصد د واقعیتونو د رښتیني انځور وړاندې کولو په لاره کې د هېڅ کوم لوري اغېزې نه مني او په بشپړ ډول بې‌پرې او پر واقعیتونو ولاړې څېړنې کوي. په دې توګه قاصد هڅه کوي، د سیاستونو او تګلارو د جوړتیا او سمون لپاره د پالیسي جوړوونکو او حاکمو لورو پام د هغوی رسالت او مسؤولیت ته راواړوي.