قاصد پژوهشهای واقعبینانه
دوه کاله وړاندې د ۲۰۲۰م کال د اګست په ۱۹مه نېټه دکتور عبدالباقي امین د افغانستان په پلازمینه کابل کې د یوې خونړۍ دسیسې ښکار شو. نوموړی د ده په ځانګړي دولتي موټر کې، چې دی یې خپلې دندې ته بېوه، د مخکې نه ځای پر ځای شوو چاودېدونکو توکو د انفجار په پایله کې شهید شو. دکتور امین د شهادت مقام ته ورسېد اما هغه مزل یې چې پیل کړی و په نیمه کې پاتې شو.
دکتور امین د افغانستان د پوهنې په وزارت کې د علمي شورا رئیس وو او په همدې وخت یې د قاصد د ستراتژیکو څېړنو مرکز مشري هم کوله. هغه د سولې لپاره پراخې هڅې پیل کړې وې او غوښتل یې د افغانستان اوږدمهاله شخړه د زور له کارولو پرته د خبرو اترو او مفاهمې له لارې حل شي او یوه داسې حکومتي اداره رامنځته شي چې ټول افغانان پکې خپل ځان وګوري. دکتور عبدالباقي امین د هېواد پر سوکالۍ، پرمختګ او یوه متمدن افغانستان باور لاره.
د دکتور امین هڅو تر ډېره بریده ښه پایله لرله او د تفکر خونه، چې ۴۵ تنه مخکښ تجربه لرونکي سیاستوال پکې شامل وو، د افغانستان د قضیې د سولهییز حل په درشل کې روښانه قدم وو چې د شهید دکتور امین په ملتیا او ګډون رامنځته شوه. له بده مرغه پر دغه وخت د جګړې ټېکه داران ووېرېدل چې ګواکې د افغانستان په قضیه کې نور جنګ د پای ټکی مومي او افغانستان د سوکالۍ خواته درومي، نو ځکه یې د سولې د پراخو هڅو د درولو په موخه دکتور امین په نښه کړ او په افغانستان کې یې د سولې د ګړندي بهیر مخه ونیوله.
دکتور عبدالباقي امین د اسلامي علومو متخصص، استاد او یو مخکښ علمي شخصیت و. هغه د افغانستان په سلام پوهنتون، د سودان په جامعه افریقیا، د لیبیا په الاسمریة اسلامي پوهنتون او د پاکستان د اسلام آباد په اسلامي پوهنتون کې د استاد او علمي کادر په حیث دنده ترسره کړېده. نوموړی د لسکونو کتابونو او علمي آثارو لیکوال وو او په خورا ډیرو علمي کانفرانسونو کې یې ګډون کړی و. دکتور امین په خپل کاري ژوند کې د افغانستان د پوهنې د وزارت د علمي شورا رئیس، د ستراتیژیکو او سیمه ییزو څېړنو د مرکز رئیس او په پای کې د قاصد د ستراتیژیکو څېړنو د مرکز د رئیس په توګه دنده تر سره کړېده.
موږ په داسې حال کې چې په هېواد کې د جګړې ټولو شهیدانو او متضررینو ته دعا کوو، د دکتور عبدالباقي امین په شهادت خورا غمګین یو او د دې ترڅنګ چې عاملانو ته یې د لوی الله ج له دربار څخه مجازات غواړو، هیله لرو چې قاتلان به یې وپېژندل شي او په علني توګه به د خپل دغه کرغېړن عمل سزا وګوري.
